Орындаушылардың І республикалық “Армандастар” ән байқауынан кейінгі ой
Қазақ ән өнерінің деңгейін жаңа сатыға көтеріп, елін, оның ақжарқын адамдарын шексіз сүйіп әнге қосқан көрнекті сазгер Әсет Бейсеуовтің өмірден озғанына да биыл он жылдан асып барады екен. Өткен аптада Жайықтың жағасында дүркіреп өткен Әсет Бейсеуов әндерін орындаушылардың І республикалық “Армандастар” ән байқауы осындай мерзіммен тұспа-тұс келді.
Білім және ғылым, Мәдениет және ақпарат министрліктерінің келісіміне сай Махамбет атындағы Батыс Қазақстан мемлекеттік университетінің ректоры Тұяқбай Рысбеков бас болып осы білім ордасы ұйымдастырған бұл шара өзінің көздеген мақсатына жетті деуге толық негіз бар. Аталмыш байқауға республика жоғары оқу орындарында оқитын өнерлі студенттер мен 30 жасқа дейінгі орындаушы әншілер қатысты. Сөйтіп, мұнда республиканың он облысынан келген 24 жас орындаушы екі күн бойы Әсеттің әсем әндерін әуелетті.
Байқаудың қазылар алқасының құрамында кезінде Әсет Көпбайұлымен ұдайы шығармашылық байланыста болған Кеңес Дүйсекеев, Нұрғали Нүсіпжан және Серік Тұрғынбекұлы секілді өнер мен поэзия саңлақтары болуы да жазылмаған заңдылықтай көрінеді.
Айталық, халықтың шексіз сүйіспеншілігіне бөлене білген Әсеттей кең тынысты талант иесінің ішкі жан дүниесін, оған тән вокалдық музыка иірімдерін Кеңестей белгілі композитор терең түсіне алады десек, ұзақ жылдар бойы Әсет әндерін орындап, оны тыңдармандардың құлағына бояуын бұзбай жеткізіп келе жатқан Нұрғали Нүсіпжанның орны да бөлек екені анық. Сонымен бірге Ә.Бейсеуовтің көптеген әндеріне сөз жазған Серік Тұрғынбекұлындай ақынның қазылар алқасының құрамында болуы да, сөз жоқ, әділ шешім.
Байқаудың ашылу рәсімі кезінде Кеңес Дүйсекеев: Қазақ ән өнерінде Әсет Бейсеуовтің өз орны бар. Ол жүрегі, табиғаты таза жан еді. Таза өнерді де тек осындай табиғаты таза адамдар жасай алады десе, Нұрғали Нүсіпжан бұл ойды одан әрі тереңдете түсіп: Қарапайым да ақкөңіл, көңілі даладай дархан, сәбидей пәк Әсекең өзінің елу сегіз жылдық қысқа ғұмырында ешкімнің ала жібін аттамай өтті. Әсет бізге терең патриотизм, шексіз махаббатқа, сыршыл сезім күйіне толы әндерін аманат етіп тастап кетті. Біз осы аманатқа қиянат жасамауға тиіспіз. Бәйгенің аты — бәйге, байқаудың аты — байқау. Сондықтан оған қатысқандардың бәрі жүлдегер, жеңімпаз бола бермейді. Алайда, мұндай байқауға қатысудың өзін жеңіс деп біліңіздер, деп ой түйді.
Әсет Бейсеуов әндерін орындаушылардың І республикалық “Армандастар” ән байқауы нақ Ақжайық топырағында өтуінің астарынан жаңсақ сыр іздеудің қажеті жоқ шығар. Шын мәнінде нағыз, хас таланттың өзі де, өнердегі жолы да бүкіл елге, халыққа ортақ. Ол аймақтық немесе өңірлік меншіктеуге келмейді. Оның үстіне Алатаудың етегінде туып-өскен Әсет Көпбайұлының жүрегіне бүкіл Қазақстан сыйып кететін еді. Ол республиканың қай түкпіріне барса да, ондағы ел-жұртқа өз перзентіндей еркелеп барушы еді, деген-ді оның өнердегі рухани досы Нұрғали аға.
Сол айтқандай, ол көзі тірісінде Ақжайық өңірінен де өзіне рухани тірек бола алатын достар тапқаны өз алдына бір бөлек әңгіме. Әсет Бейсеуовтің Орал өңіріндегі осындай жан досы, қазақ өнерінің жанашыры елге сыйлы, беделі биік азамат, Мемлекеттік сыйлықтың лауреаты Әділғазы Нұрғалиев десек, сірә да қателеспейміз.
Жалпы, Әсекең тек Жайық өңіріне қатысты жиырмаға тарта ән шығарыпты. Сондай шоқтығы биік әндерінің бірі “Ағаларымды” бүгінде ағайындарымыздың қай-қайсысы да сүйсіне шырқайды. Өмірдің гүлі, сұлулық символы саналатын ақылына көркі, сөзіне ісі сай қыз-келіншектер шынайы өнер иесінің шабытына шабыт қоса алатынын жасырып қайтеміз. Бұл тұрғыда композитордың Жайық аруларына арнаған әндерінің өзі тұтас бір дүние дерліктей. Олардың арасында “Аққу қыздар”, “Жайық қызы Марфуға”, “Мағрипа”, “Гүлдария”, “Гүлсара” атты көпшілікке кең тараған әндері бар.
Иә, Жайықтың жағасында екі күнге созылған ән мерекесі Әсет Бейсеуов өмірден озған соңғы он жылдың ішінде атқарылған көрнекті шаралардың бірі десек, қателеспейтін шығармыз. Енді ән байқауы несімен ерекшеленді дегенге келейік.
Бүгінде жас ұрпақты ел мен жерді, туған топырақты сүюге тәрбиелеу, оған деген құрмет сезімдерін орнықтыру, олардың бойындағы отаншылдық сезімнің шоғын үрлеу бұрынғы қай кездегіден де қажеттірек. Осы орайда елдің рухын биіктетуге ықпал жасай алатын Әсеттің әсем әндерінің орны бөлек. Байқаудың бірінші ұтымды тұсы дәл осында екені талассыз.
Екіншіден, байқау бүгінгі жастар мен студенттер арасында Әсет Бейсеуовтей қайталанбас, кесек талант есімінің қайтадан жаңғыруына жол аша алғанын байқадық. Ең бастысы, Әсет әндерін арқау еткен республикалық байқау жас орындаушылардың кәсіби деңгейін өсіруге септігін тигізіп, жас таланттардың тұсауын кесті. Қазақ әнінің құдіретіне бас иетін жаңа есімдерді өмірге келтірді.
Иә, Әсеттің әсем әндері бүгінгі ұрпақ үнімен бірге қазақ еліне қызмет ете берері күмәнсіз
Егемен Қазақстан 2010 жыл, 12 наурыз
http://egemen.kz/old/?act=readarticle&id=2754 сайтынан алынды
|